大洋新闻 时间: 2013-05-10来源: 信息时报
◎李月婷 编辑
港产片里边有句经典对白，有啲江湖大佬教训人嘅时候都会讲“你够姜”。听唔明广州话唔紧要，单睇字面意思就知道呢句话系形容某人好似姜咁，够辣够霸气够犀利。
姜性温味辛，可以开胃止呕兼发汗解表。喺广州人嘅食谱里边，佢系唔可以缺少嘅一种调味料。最常见嘅就系姜葱，白切肉类同姜葱一齐食，可以提升鲜味，亦都可以去腥。夏天热，有啲街坊滚菜汤瓜汤嘅时候，都中意落几片生姜。据讲咁样可以辟走汤里边嘅寒气，饮咗都唔怕胃寒。其实，姜唔单止可以用嚟提味去腥，佢仲系产妇补身嘅一道良药。但凡添丁，家家户户都会煲好多猪脚姜俾坐月嘅产妇食，有时仲派埋俾街坊。除咗煲姜醋，屋企仲要备多啲生姜用嚟煲水，俾产妇洗头冲凉。
大家都听讲过，广东有“三件宝”，就系陈皮、老姜同埋禾秆草。姜有咁多用途，的确系“一宝”。唔好以为煮餸先可以用姜，其实姜用嚟做甜食都一样咁出名。广州有沙湾姜撞奶，台湾有黑糖姜母茶，天气冻嘅时候食返一碗，食完之后包保你出一身汗，成身暖笠笠。
不过，最近大家去市场买姜嘅话，真系要打醒十二分精神。皆因山东嘅姜农“够姜”，居然用剧毒农药嚟种姜，一唔小心就会出事。所以，一班师奶都转晒去买本地姜。有师奶教路，本地姜卖相唔及山东姜，个头细颜色黑表面又粗糙，一眼就可以分得出嚟。仲有，大家食姜嘅时候最好唔好刮皮，洗干净就可以切丝分片喇。
（原标题：“够姜”嘅姜）